उच्च जोखिमका कारण मंगला गाउँपालिका १ नम्बर वडा सिल गरीएको छ । मंगला गाउँपालिका १ नम्बर वडा कुहूँ र पुर्णगाउँमा गरिएको एन्टिजेन चेकमा ३९ जनालाई कोभिड-19 पोजेटिभ देखिएको थियो। पोजेटिभ जति सबैमा कोरोनाको लक्षण ज्वरो आउने रुघाखोकी लाग्ने गरेकोले मिति २०७८/३/१३ गतेदेखि मिति २०७८/३/२३ गते सम्म १० दिनको लागि अर्को सूचना जारी नभए सम्म मंगला गाउँपालिका-१ नम्बर वडा लाई पुर्णरुपमा सिल गरिने भएको छ ।
वडा कार्यलय, सहकारी तथा वित्तीय संस्थाहरुको सेवा समेत बन्द गरिने भएको छ, अति आवश्यक काम बाहेक गाउँ भन्दा बाहिर कसैलाई पनि नजान र आउन नदिन भनिएको छ। यो समय अवधिभर एम्बुलेन्स, बिरामीको लागी प्रयोग गरिएको गाडी, गाउँपालिकाको औषधि ढुवानीका साधन र विकास निर्माणका कामका ढुवानी बाहेक अरु यातायातका साधनहरु पुर्णरुपले बन्द गरीएको खाद्यान्नका सामाग्री समेत गाउँपालिकाको निर्देशनमा सिमित समयमा ढुवानीको प्रबन्ध गरिने छ। यस समय अवधिभर नियम बिपरित कसैले नियमको उल्लंघन गरेको पाइएमा सवारी साधन समेत नियन्त्रणमा लिएर राखिने र नियम अनुसार कार्वाही गरिने भएको छ ।
कोरोनाको जोखिम विस्तारै घट्दै गइरहेको अवस्थामा एक्कासी ठूलो संख्यामा बिरामी भेटिएपछि एन्टिजेन परीक्षण सहित कोरोनाको लक्षणसँग मिल्ने बिरामीलाई घरमै सुरक्षित बस्न अनुरोध गरिएको गाउँपालिका अध्यक्ष सतप्रसाद रोकाले बताउनुभयो । ‘जोखिम बढेको छ, थप लापरवाही गरिए संक्रमतिको संख्या ह्वात्तै बढ्ने छ’ अध्यक्ष रोकाले भन्नुभयो ।
समुदायमा कोरोना फैलिएकाले परिस्थिति सहन नहुन्जेलसम्मका लागि एक मात्रै विकल्प वडा सिल भएको वडा सदस्य दिलकुमारी खत्रीले बताउनुभयो । ‘सिल’को अवधिभर स्थानीयवासीलाई कुनै पनि अवस्थामा घर बाहिर ननिस्कन, घरमा बसेका मानिसबाहेक अरु आफन्त, नातेदार, साथीहरू कसैसँग सम्पर्क नगर्न, आउजाउ नगर्न टोलटोलमा अनुरोध समेत गरिएको छ । कुहुँमा जनप्रतिनिधि सहित समुदायमा कोरोना पुष्टी भएको थियो ।
